Frá Hartmanni: Um inniþríþrautina í Laugum.

Skrifað af Hartmann Bragason

mánudagur, 25 febrúar 2008

ÚRSLITIN Í INNI-ÞRÍÞRAUTINNI: Í fyrra komu þríþrautarkonurnar, sáu og sigruðu en að þessu sinni var metþátttaka hjá karlpeningnum (sjá úrslit: http://www.triceland.net). Bryndís Ernstdóttir vann kvennaflokkinn með miklum yfirburðum enda er hún, ásamt öðrum systkinum sínum, mikil hlaupakona og “gömul í sund-hettunni”. Athygli vekur að þrjár kvennanna voru þýsk-íslenskar en í karlaflokkinum kepptu tveir Danir, auk Englendings og Spánverja (?). Yfirumsjón með keppninni hafði og “Frakkinn” Remi sem er formaður Þrír-R. Þetta sýnir vel hina breyttu samsetningu Íslendinga og þær vinsældir sem þríþrautin nýtur erlendis. Annað sem vekur athygli er hversu jafn og góður karlaflokkurinn var. Sem dæmi var undirritaður í þriðja sæti í fyrra en þrátt fyrir að hann hafði bætt sig um eina mínútu í ár hafnaði hann nú í miðjum flokkinum. Engu að síður þykir frammistaða hans og aldursforsetans, Sigurbjörns Einarssonar sýna og sanna að “gömul vín batna með aldrinum”. Sundþjálfarinn Niklas Brix varð óvænt í þriðja sæti en hann þjálfar m.a. þrír-R. Steinn Jóhannsson vann keppnina naumlega en hin gamalreynda fjölíþróttakempa Torben Gregersen var aðeins nokkrum sekúndum á eftir (örlaganorn lagði eitt sinn á Torben að vera (nær) alltaf í 2. Sæti). Steinn hefur einkum látið af sér kveða í maraþonhlaupum. Þessir kappar, ásamt hinum fræknu maraþonhlaupurum Gísla Ásgeirssyni og Trausta Valdimarssyni, stefna að því ásamt öðrum að keppa í járnkarlinum í Köln í sumar og víðar. Það má ekki minna vera en að keppt verður aftur í hálfum-járnkarli á Íslandi í sumar sem verður ómetanlegur undirbúningur fyrir þessa erfiðu keppni. Þess má geta að Gísli skrifaði skemmtilega grein í vefsíðu Þrír-R um Inni-þríþrautina í ár. Gísli vitnaði m.a. í Grettis sögu Ásmundarsonar, þar sem hann kom með frumlega kenningu um að Grettir hefði verið fyrstur manna til þess að keppa í þríþraut, amk hér á landi. Gísli hyggst endurreisa Grettis-þríþrautina aftur til vegs og virðingar en hún þykir vera með frumlegu sniði. Keppnin hefst væntanlega 1. Apríl í ár með Drangeyjarsundi því fylgt verður dyggilega í spor Grettis. Af gefnu tilefni langar mig að minnast á að mikið álag er á tímatökumönnum í þríþrautarkeppnum. Það geta því komið fyrir mistök í sambandi við tímatökuna. Ef einhverjir keppenda renna í grun um að ekki sé allt með felldu með tíma þeirra er nærtækast að senda Remi skeyti þ.a.l. en hann er í þríþrautarliðinu. Hartmann Bragason 25.2.2008 06:

Síðast uppfært ( mánudagur, 25 febrúar 2008 )

 

< Fyrri		Næsti >