Við fórum tveir meðlimir Þríþrautarfélagsins, Steinn Jóhannsson og Jens V. Kristjánsson (ásamt Viggó hinum sérlega aðstoðarmanni), norður á Laugar til að prófa hina árlegu Þríþraut þeirra Þingeyinga/Norðlendinga.
Þingeyingar hafa haldið ólympíska þríþraut árlega í 6 ár og löngu kominn tími til að kíkja á þetta hjá þeim.

Það er skemmst frá að segja að þetta var hin fínasta keppni, góð aðstaða, fínar keppnisleiðir og skemmtilegir félagar - bæði starfsfólk og keppendur.  Veðrið var aðeins að stríða okkur, norðangjóla og rigning, en okkur skildist að það væri í fyrsta sinn sem ekki væri rjómablíða - því hlýtur að vera tryggt frábært veður næstu 5 árin.
Því miður duttu nokkrir sterkustu keppendur þeirra norðanmanna úr leik stuttu fyrir keppni, en við fengum samt fína keppni, sem Steinn vann þó með nokkrum yfirburðum.

Að keppni lokinni vorum við viðstaddir stofnun Þríþrautarfélags Norðurlands og bárum nýstofnuðu félagi hamingju- og vináttuóskir okkar í Þríþrautarfélaginu.  Vonir standa til að samstarf félaganna verði mikið og vaxandi á næstu árum.